Бірыңғай уақыт белдеуіне көшу энергия тұтынуға әсер етті ме: Энергетика министрлігі өкілдері пікір білдірді

Энергетика министрлігі өкілдері бірыңғай уақыт белдеуіне көшу электр энергиясын тұтыну кестесінде айтарлықтай өзгерістерге әкелмегенін мәлімдеді. Бұл туралы ведомстоға сілтеме жасаған KAZ.NUR.KZ хабарлайды.

Энергетика министрлігінің ресми сайтында жарияланған мәліметке сүйенсек, Қазақстанның энергетикалық жүйесі уақыт белдеуінің өзгеруіне қарамастан, жұмыстың тұрақтылығы мен тиімділігін көрсетіп отыр.

"Жақында бір уақыт белдеуіне көшу электр энергиясын тұтыну кестесінде айтарлықтай өзгерістерге әкелмеді.

Баршаға мәлім, елдегі электр энергиясын тұтыну халықтың күнделікті өмір тіршілігімен тікелей байланысты. Ең жоғары жүктемелер таңертеңгі және кешкі сағаттарда, тұрмыстық тұтыну деңгейінің жандануына кезінде болады.

Уақытты бір сағатқа ауыстыру электр желісінің қызметінің бұзылуына немесе тұтынушылар үшін шектеулерге әкелмеді", - делінген ведомство хабарламасында.

Министрлік өкілдерінің мәліметінше, 2023 және 2024 жылғы қаңтар-қыркүйектегі деректерді талдау электр энергиясын тұтынудың 4 пайыз деңгейінде тұрақты өсуін көрсеткен.

"Бұл өсім уақыт белдеулеріндегі өзгерістерге емес, жалпы халықтың және ел экономикасының тұтынуының табиғи өсуіне байланысты.

Мысалы, еліміздің батыс БЭЖ-нің аймағында уақыт белдеуінің ауыспағанына қарамастан, тұтыну өткен жылдың сәйкес кезеңімен салыстырғанда 10,4 пайызға артқаны байқалады.

Сонымен қатар электр энергиясын бірыңғай сатып алушы тетігі іске қосылғаннан кейін электр энергиясының импорты ұлғайды, өйткені тапшылықты ең жоғары сағаттарда жабу мақсатында іргелес елдерден электр энергиясының жоспарлы ағындарын ұйымдастыру мүмкіндігі пайда болды және жөндеу жұмыстарының жоспарланған кезеңдеріне сәйкес елдің барлық ірі электр станцияларына күрделі жөндеу жүргізуге мүмкіндік берді", - делінген Энергетика министрлігі хабарламасында.