Алматыда биыл қай жерлерде тегін коньки тебуге болады: мұз айдындарының тізімі жарияланды (фото)

Биылғы қыста қала тұрғындары мен қонақтары үшін Алматының барлық аумағында 12 тегін сырғанау алаңы ашылады. Бұл туралы KAZ.NUR.KZ хабарлайды.

Алматыда қала тұрғындары мен қонақтары үшін тегін 12 мұз айдыны ашылады, деп хабарлады спорт басқармасы. Мұз айдындарының ашылуы алматылықтар мен қала қонақтарына қысқы демалысын белсенді өткізуге мүмкіндік береді.

Мұз айдындарының ауданы 500-ден 1900 шаршы метрге дейін жетеді және онда бір маусымда 300 мыңнан астам адам коньки тебе алады.

Қонақтар мұз айдындарында конькиді жалға ала алады. Жалдау ақысы 2 сағатқа 1500 теңге. Жалдау пункттері жұмыс күндері сағат 10:00-ден 22:00-ге дейін, демалыс және мереке күндері 10:00-ден 23:00-ге дейін жұмыс істейді. Егер өзіңіздің конькиіңіз болса, тегін сырғанай аласыз.

Мұз айдындары ауа райы қолайлы болса, 1 желтоқсанда ашылады деп күтілуде. Кейбір сырғанау алаңдары қазірдің өзінде сынақ режимінде жұмыс істеп тұр.

Айта кетейік, бұл жоба 2017 жылы басталған. Содан бері 2 миллионнан астам адам жергілікті мұз айдындарына барды.

Мұз айдындары күн сайын келесі мекенжайлар бойынша жұмыс істейді:

• Республика сарайының алдындағы Абай алаңы;
• Halyk Arena;
• 28 батыр-панфиловшылар атындағы саябақ;
• Тұңғыш Президент атындағы саябақ;
• Наурызбай ауданы әкімдігі алдындағы алаң;
• ҚБТУ автотұрағы;
• "Авиатор" стадионы;
• "Көкжиек" ықшамауданы;
• "Гүлдер" саябағы;
• Almaty Arena;
• №6 Оқушылар үйі;
• Мүсірепов атындағы Жастар театрының алды.