"Қолын бұрап, саусағын қайырған": лифтке жасөспіріммен бірге мінген Астана тұрғыны ұсталды (видео)

Желіде ұлын лифтте мас ер адам қорқытқанын айтқан Астана тұрғынының үндеуі пайда болды. Полицейлер тергеуді бастады, деп хабарлайды елордалық полиция департаментіне сілтеме жасаған KAZ.NUR.KZ.

Telegram-дағы "Жалобы Астана" арнасында елорда тұрғыны 15 жасар ұлын белгісіз мас ер адам қорқытқанын айтқан. Оның айтуынша, оқиға 28 қарашада сағат 22.10-да болған.

"Бұл адам алкогольге мүмкін есірткіге мас күйде, 15 жасар балама әдепсіз сөздер айтып, оны өлтіремін деп қорқытқан. Содан кейін оны тұншықтырмақшы болып, лифттен шығармауға әрекет жасаған. Физикалық күш көрсетіп, қолын бұрап, саусағын қайырған", - делінген жазбада.

Баланың анасының айтуынша, ер адамды полицейлер ұстаған, бірақ ол қарсылық көрсеткен.

KAZ.NUR.KZ тілшісі түсініктеме алу үшін Астана полиция департаментінің баспасөз қызметіне хабарласты.

"Бұл факті бойынша құқық бұзушы анықталып, уақытша ұстау изоляторына қамалды, тергеу нәтижелері бойынша заңға сәйкес шаралар қолданылады", - деп хабарлады ПД өкілдері.

Ескерту! Видеода бейәдеп сөздер бар!