"Полицейлердің" ақша бергені түсірілген видео: Қарағанды облыстық ПД өкілдері түсініктеме берді

Әлеуметтік желіде балқаштық "полицейлердің" прокурорға ақша беріп жатқаны көрсетілген видео пайда болды. Видеоға Қарағанды облысының ПД өкілдері түсініктеме берді, деп хабарлайды KAZ.NUR.KZ.

Видео бірнеше күн бұрын Instagram желісіндегі DK_VKO паблигінде, кейінірек басқа да парақшаларда тарап кетті.

Видео авторы кадрларда полиция қызметкерлерінің прокурордың көмекшісіне ақша беріп жатқаны көрсетілгенін айтады.

Қарағанды облысының полиция департаменті өкілдері видеоға қатысты түсініктеме берді. Бұл 2014 жылғы видеожазба екені белгілі болды.

"Ол бойынша қызметтік тексеріс жүргізілуде, оның қорытындысы бойынша тиісті шешім қабылданады. Сонымен бірге биыл ақпан айында видеоға қатысы бар тұлғалардың біріне қатысты күдікпен қылмыстық іс қозғалды. Заңсыз әрекет жасаған азамат қазіргі уақытта қамауда отыр", - деп хабарлады департаменттің баспасөз қызметі өкілдері.