Шымкентте жас сақшылар полиция жұмысымен танысты

Шымкентте жас сақшылар полиция жұмысымен танысты. Бұл туралы Polisia.kz хабарлайды.

"Жас сақшы" сыныбының кадеттері бір күнін полиция департаментінде өткізіп, жедел басқару орталығы, жедел-криминалистика басқармасы және арнайы жасақтың қызметімен танысты.

Департаментке оқушылар мен олардың ата-аналары барды. Жас сақшылар департаменттегі күнін жедел басқару орталығында бастады. Мұнда олар қаланың өмірін сыртқы бейнекамералар арқылы бақылап, олардың қалай жұмыс істейтінін білді.

Келесі полицейлік тәжірибені олар жедел-криминалистикалық басқармасында алды. Криминалистикалық зертханада болашақ полицейлер қылмысты саусақ іздері мен қылмыскер қалдырған басқа іздер арқылы қалай ашуға болатыны жайында ақпарат алды.

Сондай-ақ балалар жылдам әрекет ететін жасақтың сауыт-саймандарын көріп, жауынгерлерден өзін-өзі қорғаудың кейбір әдістерін тамашалады. Іс-шара болашақ тәртіп сақшыларына Шымкент полициясының тарихы туралы кітаптарды табыстаумен аяқталды. Өз кезегінде балалардың ата-анасы полицейлерге алғысын жеткізді.