"Каспий" футбол клубының бұрынғы директоры бопсалау ісі бойынша тергеуге алынды

Антикор "Каспий" футбол клубы" ШЖҚ МКК бұрынғы директоры мен деструктивті діни топтардың өкілдеріне қатысты тергеу жүргізіп жатыр. Бұл туралы KAZ.NUR.KZ агенттікке сілтеме жасап хабарлайды.

Күдіктілерге зорлық-зомбылықты қолдана отырып, аса ірі мөлшерде ақша бопсалады деген айып тағылуда.

Маңғыстау облысы прокуратурасының үйлестіруімен Қылмыстық-процестік кодекстің 128-бабына сәйкес үш күдікті ұсталып, уақытша ұстау изоляторына қамалды.

Бұған қоса тергеу барысында футбол клубының бұрынғы директорының оқу-жаттығу жиындарын ұйымдастыру үшін бөлінген бюджет қаражатын жымқыруға қатысы тексеріліп жатыр.

Тергеу жалғасуда, ал істің мән-жайы тергеу құпиялығына байланысты жария етілмейді.

Айта кетейік, Қазақстан Конституциясының 77-бабы 3-тармағының 1-тармақшасына және Қылмыстық-процестік кодекстің 19-бабы 1-бөлігіне сәйкес, соттың заңды күшіне енген үкімі шыққанға дейін әрбір адам кінәсіз деп есептеледі.