ҰҚК өкілдері 2024 жылы аса қауіпті 19 ұйымдасқан қылмыстық топтың әрекетіне тосқауыл қойған (видео)

Ұлттық қауіпсіздік комитеті трансұлттық және өңірлік қылмыстық топтарға қарсы тұруға арналған кешенді шараларды іске асырады. 2024 жылы комитет полиция органдарымен бірлесіп, аса қауіпті 19 ұйымдасқан қылмыстық топтың әрекетін тоқтатты. Бұл туралы ведомствоға сілтеме жасаған KAZ.NUR.KZ хабарлайды.

Комитеттің Telegram-дағы парақшасындағы ақпаратқа сәйкес, ауыр және аса ауыр қылмыстар жасағаны үшін ұйымдасқан қылмыстық топтың 72 жетекшісі мен белсенді қатысушысы қылмыстық жауапкершілікке тартылды.

"Жалпы алғанда, 98 адам кісі өлтіру, тонау, бопсалау және басқа да ауыр қылмыстар жасағаны үшін күдікті ретінде ұсталды. Олардың ішінде шетелдік қылмыстық топ жетекшілерінің көмекшілері де анықталған.

40 адам сотталып, қалғандарына қатысты сотқа дейінгі тергеу жалғасуда. Ұйымдасқан қылмыспен күрес бойынша іс-шаралар әрі қарай да жалғаса бермек", - делінген комитет хабарламасында.

ҰҚК қоғамдық қауіпсіздікті қамтамасыз ету және қылмыстық топтардың әрекеттерін түбегейлі жою мақсатында кешенді жұмыстарын жалғастырып жатыр.

Мәтіннен қате тапсаңыз, бізге жазыңыз