"Сербияда ұсталды": алаяқтық жасаған деген күдікпен іздеуде болған қазақстандық экстрадицияланды
Жарияланған күні:
Елде алаяқтық дерегі бойынша іздеу салынған күдікті Сербиядан экстрадицияланды. Бұл жөнінде Ішкі істер министрлігіне сілтеме жасаған KAZ.NUR.KZ хабарлайды.
Ведомствоның Telegram-дағы ресми арнасында жарияланған ақпаратқа сүйенсек, ІІМ Интерпол Ұлттық орталық бюросының сұрауымен 2023 жылдың қыркүйек айында көлемдегі алаяқтық жасағаны үшін халықаралық іздеуге жарияланған ер адам Сербияда ұсталған.
"Бүгін 45 жастағы күдіктіні Бас прокуратура өкілдері Қазақстанға экстрадициялады", - делінген хабарламада.
Полиция мәліметінше, 2017 жылы ол Kolesa.kz сайтында қолжетімді бағада арнайы техника сататыны туралы хабарландыру жариялап, ел тұрғынын алдап соққан. Жәбірленуші онымен келісімшарт жасасып, 43 млн теңгеден астам ақшасын аударған.
Еске салсақ, Дубайда Қазақстан азаматы ұсталғанын жазған едік. Ол компанияның қомақты ақшасын иемденді деген күдікке ілінген.
Сондай-ақ Алматыда көрші мемлекетте іздеуде жүрген ер адам ұсталды. Ол жалған құжат жасап, ақша ұрлады деген күдікке ілінген.
Мақаланың түпнұсқасы: https://kaz.nur.kz/society/2209725-serbiiada-ustaldy-alaiaqtyq-zhasagan-degen-kudikpen-izdeude-bolgan-qazaqstandyq-ekstraditsiialandy/
