Таразда боранды күні жолда қалған шетелдіктерді полиция қызметкері үйіне қонақ етті (видео)

Тараздық полиция қызметкері боранда жолда қалған шетел азаматтарын үйіне қонақ қылды. Бұл туралы белгілі кәсіпкер Талғат Белесов Instagram-дағы парақшасында жазды, деп хабарлайды KAZ.NUR.KZ.

Кәсіпкер жолда қызметте тұрған полиция қызметкерінің қонақжайлығына ризашылық білдіріп, видео жариялады.

Видеода полиция қызметкері көліктегі жолаушыларға жол ашылғанша Таразда бір-екі күн қалып, қонақ болуға шақырады.

"Айша бибі ауылының тұрғындары боранда жолда қалған барлық жолаушыға үйлерін ашып, ыстық тамақ ұсынып жатыр. Серік есімді полиция қызметкері бізді жол үстінде тоқтатып, жол ашылғанша өз үйіне қонақ етті. Сонымен қатар Тараз қаласының басқа да полиция қызметкерлері жолаушыларға қолдау көрсетіп жатыр. Қазақтың бірлігі арта берсін!", - деп жазды автор.

Шетел азаматтары да полиция қызметкерінің әрекетіне таңғалысын жасыра алмады.

"Біз қарлы боранда тұрып қалдық. Содан кейін біз осындай мейірімді полицейді кездестірдік. Ол бізді үйіне шақырды. Біз өте көп астан дәм таттық. Түнгі 2.00-ге дейін әңгіме айттық. Қандай тамаша отбасы! Қазақстандағы қонақжайлыққа ештеңе тең келмейді", - дейді шетелдік қонақтар Instagram-дағы stories бөлімінде.

Жамбыл облыстық полиция департаменті өкілдері шетелдік азаматтарды үйіне қонақ еткен аға лейтенант Серік Есенғали полиция басқармасының патрульдік полиция батальоны инспекторы болып қызмет ететінін айтты.

Мәтіннен қате тапсаңыз, бізге жазыңыз