Алмас Кішкенбаев 15 тәулікке қамауға алынды

Алматыда Алмас Кішкенбаевқа қатысты іс жабық түрде қаралды. Ол Әкімшілік құқық бұзушылық туралы кодекстің 434-бабы 1-бөлігі бойынша кінәлі деп танылып, 15 тәулікке қамауға алынды, деп хабарлайды KAZ.NUR.KZ Алматы соттарының баспасөз қызметіне сілтеме жасап.

Алматы соттарының баспасөз қызметінің хабарлауынша, Әкімшілік құқық бұзушылық туралы кодекстің 434-бабы 1-бөлігінде қоғамдық тәртіп пен тыныштықты бұзатын жеке тұлғаларға зәбірлеп тиiскені үшін жауапкершілік қарастырылған.

Сот К.-ның мас күйінде бола тұра, осындай әрекеттер жасағанын анықтаған.

"Сотта К. оқиғаның мән-жайы есінде жоқ екенін түсіндірді. 434-баптың 1-бөлігінің санкциясы 20 АЕК мөлшерінде айыппұл салу немесе 5 күннен 15 тәулікке дейін әкімшілік қамаққа алу түріндегі жауапкершілікті қарастырады.

Жауаптылықты жеңілдететін мән-жайлар анықталған жоқ.

Сонымен қатар жауаптылықты ауырлататын мән-жай мас күйінде құқық бұзушылық жасау болып анықталды", - делінген хабарламада.

Жоғарыда айтылғандардың негізінде К. кінәлі деп танылып, оған 15 тәулікке қамауға алу жазасы тағайындалды.

Сот қаулысы заңды күшіне енген жоқ.