Шығын 92 миллион теңге: Оңтүстік Кореяға жұмыс визасын алмақ болған 20-дан аса адам сан соғып қалған

Түркістан облысында Оңтүстік Кореяға жұмыс визасын жасап беремін деген желеумен адамдарды алдады деп айыпталған тұрғынға сот үкімі шықты. Бұл туралы облыстық прокуратураға сілтеме жасаған KAZ.NUR.KZ хабарлайды.

"Түркістан облысында алаяқ 2023-2024 жылдар аралығында 23 жәбірленушіні Оңтүстік Корея мемлекетіне еңбек қызметін жүзеге асыру үшін жұмыс визасын жасап беремін деп алдау арқылы 92 020 000 теңге жымқырған.

Сот барысында мемлекеттік айыптаушы сотталушының кінәсін толық дәлелдеді", - делінген хабарламада.

Айыпталушы 6 жыл мерзімге бас бостандығынан айырылған, сондай-ақ 23 жәбірленушінің азаматтық талап қоюлары қанағаттандырылған.

Сот үкімі заңды күшіне енген жоқ.

Айта кетейік, бұған дейін алаяқтық жасады деген күдікке ілінген Қазақстан азаматы Грузиядан экстрадицияланған еді.

Мәтіннен қате тапсаңыз, бізге жазыңыз