"Мұғалімдерге қандай да бір сыйлық беру": Маңғыстауда мектеп бітіру іс-шараларына қатысты талаптар жарияланды

Маңғыстау облыстық білім басқармасы мектеп бітіру іс-шараларына қатысты талаптарды жариялады. Бұл туралы өңірдің Қоғамдық коммуникация орталығына сілтеме жасаған KAZ.NUR.KZ хабарлайды.

Қоғамдық коммуникация орталығының мәліметінше, облыстық білім басқармасы мынадай іс-шараларға қатаң тыйым салған:

• бітіруші 4, 9, 11-сынып оқушыларынан мектеп қажетіне ақша жинау;
• мектеп әкімшілігі мен мұғалімдерге қандай да бір сыйлықтар беру;
• аниматорлар, студиялар мен агенттіктерді шақыру;
• мектептің ішкі жөндеу жұмыстарына қаражат жинау;
• оқушылардың автокөлік шеруіне қатысуы;
• ойын-сауық, мейрамхана, саябаққа баруы;
• қорытынды аттестаттау кезінде ата-аналардан ақша жинап, мерекелік дастархан ұйымдастыру іс-шаралары.

"Құрметті ата-аналар! Жоғарыдағы тыйым салынған талаптарды ескерте отырып, балаларыңыздың қауіпсіздігіне бей-жай қарамауыңыз сұралады. Біз үшін басты мақсат – сіздің балаңызға сапалы білім мен саналы тәрбие беру", - дейді облыстық білім басқармасының басшысы Амантай Кумбаев.

Хабарламада егер, білім беру ұйымдарында аталған негізде ақша жинау фактілері кездессе (фото, видео дәлелдерімен) дереу білім басқармасының Call орталығына 8 (7292) 60-75-15 немесе құқық қорғау органдарын хабардар ету қажеттігі айтылған.