"Қаражат қарастырылмаған": Атырау облысында тұрғындар қарақұрт қаптағанын айтып, дабыл қақты

Атырау облысында қарақұрт қаптады. Улы жәндіктер аула ішінде, қоғамдық орындарда, тіпті саябақтарда да құжынап жүр, деп хабарлайды КТК телеарнасы.

Қарақұрттан, әсіресе Индер ауданының тұрғындары қауіптеніп отыр. Өйткені соңғы үш жылда бұл жәндік өңірде тым көбейіп кеткен. Тұрғындар малдан бұрын бала-шағаны шағып ала ма деп қорқады. Мәселен, былтыр улы жәндік шаққан жүздеген төрт түлік қырылған. Тіпті адамдар да зиян шеккен көрінеді.

Десе де, телеарна хабарлауынша, Индер ауданы әкімдігі қарақұртпен күреске бюджеттен қаражат қарастырылмағанын айтқан. Өйткені бұл улы өрмекшілер зиянкестер қатарына жатпайды екен.

"Индер аудан әкімдігі тарапынан қарақұртты аса қауіпті зиянкес ретінде реестерге тіркеу шарасының қабылдануына ұсыныс жолданды. Қазір қолданыстағы заңға сәйкес, қарақұртпен күрес үшін бюджет есебінен қаражат бөлу мүмкіндігі қарастырылмаған. Алайда жергілікті атқарушы органның ұйымдастыруымен ошақтарын жою, дезинфекциялау жүргізіліп жатыр", - дейді Индер ауданы әкімдігінің аппарат басшысы Айболат Сансызбаев.

Мәтіннен қате тапсаңыз, бізге жазыңыз