Алматының кей аудандарында бұршақ жауды (видео)

Алматының бірқатар ауданында ірі бұршақ жауды – желіде видеолар жарияланды. Ал Төтенше жағдайлар департаменті алматылықтарға үндеу жасап, алда қолайсыз күн райы болатынын, атап айтқанда, найзағай ойнап, жел күшейетінін ескертті, деп хабарлайды KAZ.NUR.KZ.

Алматыда күн райы құбылып тұр: мегаполистің бірнеше ауданында жаңбырдан бөлек ірі бұршақ жауды. Оны видеоға түсіріп алған тұрғындар кадрларды желідегі пабликтерге жолдап жатыр.

Ал қалалық ТЖД өкілдері Қазгидрометтің дауылды ескертуінің негізінде 3 мамырда түнде Алматы қаласында найзағай ойнап, қалада солтүстік-батыстан солтүстік- шығысқа қарай қатты жел соғатынын, оның жылдамдығы секундына 18 метрге дейін жететіні туралы ескертті.

Құтқарушылар қала тұрғындарына көлікті ағаштардың астында қалдырмауды сұрайды.

Сондай-ақ жел күшейсе, келесідей әрекет етуді ұсынады:

• ғимараттан шықпай, мүмкіндігінше үй-жайда болыңыз;
• егер үйде болсаңыз, есік-терезені мықтап жабыңыз. Ауладан, ашық балкондардан және лоджиядан үйіңізге зиян келтіруі мүмкін тұрмыстық заттарды алып тастаңыз;
• көшеде жүргенде жақын кіреберісте немесе дүкенде жасырынуға тырысыңыз.

Билбордтардың, ағаштардың астында, құрылысы аяқталмаған ғимараттарда, сондай-ақ үйдің қабырғаларында жасырынуға болмайды, өйткені шатырдан шифер мен басқа шатыр материалдары құлауы мүмкін;

• қатты жел кезінде электр беру желілерінің астында тұру және үзілген электр сымдарына жақындау өте қауіпті.