Еңбек министрі жазғы демалыста оқушылар мен студенттерге қайдан жұмыс табуға болатынын айтты

Жазда Қазақстанда студенттер мен мектеп оқушыларына арналған тегін оқу курстары ұйымдастырылады. Бұл туралы Еңбек және халықты әлеуметтік қорғау министрі Светлана Жақыпова үкімет отырысында айтты, деп хабарлайды KAZ.NUR.KZ.

Еңбек министрлігі басшысының үкімет отырысында айтуынша, заңға сәйкес жұмыс істеуге рұқсат етілген 14 пен 18 жас аралығындағы мектеп оқушыларының саны – 1 млн 488,6 мың, оның ішінде 26,5 мың мүмкіндігі шектеулі оқушылар.

Сонымен қатар жұмыс істеуге құқылы оқушылардың ең көбі Түркістан, Алматы, Жамбыл облыстарында және Алматы қаласында тіркелген.

Министрліктің ақпараттық жүйелерінің деректеріне сәйкес бүгінде мектеп жасындағы 24,3 мың бала жұмыспен қамтылған. Олар көбінесе сауда саласында, тамақтану қызметтерінде жұмыс істейді.

"Алдағы каникул кезеңінде студенттерді жұмыспен қамтуды қамтамасыз ету үшін келесі іс-шаралар ұсынылады – Электрондық еңбек биржасы арқылы лайықты бос жұмыс орындарын таңдау, онлайн оқыту, қоғамдық жұмыстарды ұйымдастыру және кәсіптік бағдар беру", - деді Светлана Жақыпова.

Министр электрондық еңбек биржасында (enbek.kz) арнайы "Менің жазғы демалысым" бөлімі құрылғанын, ол 14 жастан бастап білім алушыларға (мектеп оқушылары мен студенттер) платформаға тіркелуге, жеке кабинетін құруға, түйіндеме жариялауға және қолайлы бос жұмыс орындарын өз бетінше іздеуге мүмкіндік беретінін атап өтті. 16 жасқа дейінгі білім алушылар үшін жүйеге заңды өкілдері (ата-аналар, қамқоршылар) тіркеп, жеке кабинет құрып береді.

Платформа 14 жастан бастап алғашқы кәсіби тәжірибені игеруге, жұмысқа орналастырудың цифрлық құралдарымен жұмыс істеу дағдыларын үйренуге мүмкіндік береді. Ол сондай-ақ қауіпсіз жұмыс іздеуді ұсынады, сонымен қатар еңбек дағдыларын қалыптастыруға мүмкіндік береді.

Сонымен қатар Skills.Enbek онлайн оқыту платформасы мектеп оқушыларына жаңа дағдыларды үйренуге немесе бұрыннан бар қабілеттерін жетілдіруге мүмкіндік беретін түрлі салалардағы тегін және ақылы курстарды ұсынады. Бүгінгі таңда платформада 1,2 мыңнан аса курс бар, оның 322-сі тегін, ал 137 курс мемлекеттік тілде ұсынылған.