Астана тұрғындары өзі шақырған жедел жәрдем бригадасының қозғалысын бақылай алады

Денсаулық сақтау министрлігі мен Астана әкімдігі тұрғындарды өзі шақырған жедел жәрдем бригадасының қай жерде тұрғаны және оның келетін уақыты туралы ақпарат беру бойынша пилоттық жобаны іске қосты. Бригаданың қозғалысын Яндекс Go қолданбасынан немесе веб шолғыштағы картадан бақылап отыруға болады. Бұл шешім диспетчерлердің жұмысын айтарлықтай жеңілдетуге тиіс.

Қоңырау түскен кезде жүйе Яндекс Go қолданбасынан автоматты түрде push-хабарламаны жібереді, сондай-ақ бригаданың қай жерде келе жатқанын және оның болжалды келу уақытын көрсетеді. Бұл ақпаратты жақын адамыңызға қолданбадан тікелей жіберуге болады. Егер қолданба орнатылмаса, өтініш берушінің телефонына интерактивті картаға сілтеме жасалған SMS-хабарлама келеді. Пайдаланушы картаны веб шолғыштан ашқаннан кейін жедел жәрдем қозғалысын нақты уақыт режимінде көре алады. Жаңа шешім шұғыл қызметтер жұмысының ашықтығын арттыруға және диспетчерлердің жүктемесін азайтуға бағытталған.

Астана қаласының жедел жәрдем деректері бойынша диспетчерлер күн сайын 6000-ға дейін кіріс қоңырауын өңдейді, олардың 40 пайызы бригадалардың келу уақыты туралы сұрақтармен қайта жүгінеді. Яндекс Карты API негізінде әзірленген ақпараттандыру процесін автоматтандыру мұндай қоңырау санын азайтуға және ресурстарды жаңа қоңырауларды өңдеуге бағыттауға мүмкіндік береді.

Бірінші кезеңде функция Астана аумағындағы қоңырауларға қызмет көрсетеді. Шешімнің толық функционалы Астана тұрғындарына маусым айында қолжетімді болады, ал жыл соңына дейін жобаны бүкіл ел бойынша барлық шұғыл шақыруға масштабтау мүмкіндігі қарастырылып жатыр.

"Жедел жәрдем бригадасының қозғалысын көру мүмкіндігі — бұл технологиялардың ашықтықты қамтамасыз етуінің, қоңырау шалушылардың алаңдаушылығын азайтудың және диспетчерлердің жүктемесін азайтудың мысалы. Бұдан басқа цифрлық ақпараттандыру бригаданың келуіне дайындалуға, мысалы, аулада шлагбаум ашуға немесе пациенттің құжаттарын дайындап қоюға көмектеседі", — деп атап өтті Денсаулық сақтау вице-министрі Ербол Оспанов.

Функция Яндекс Карты API-ден JavaScript API шешімін қолдану арқылы жүзеге асырылады. IТ Space және 7Generation компаниялары шешімді Астананың жедел жәрдем сервисімен техникалық интеграциялаумен айналысты.

Денсаулық сақтау министрлігі еліміздің барлық азаматына медициналық көмектің сапасын, қолжетімділігін және жеделдігін арттыру мақсатында денсаулық сақтау жүйесіне цифрлық шешімдерді енгізуді жалғастырады.