"Болашақпен" оқығандарды Қазақстанда қызмет етуге міндеттеу заңды ма: стипендиат сотқа жүгінген

"Болашақ" бағдарламасының стипендиаты түлектер оқуын аяқтағаннан соң Қазақстанда қызмет етуге тиіс деген талапқа келіспей, сотқа жүгінген. Бұл туралы Қазақстан Конституциялық сотына сілтеме жасаған KAZ.NUR.KZ хабарлайды.

Азамат Қазақстан үкіметінің 2008 жылғы 11 маусымдағы № 573 қаулысымен бекітілген "Болашақ" халықаралық стипендиясын тағайындау үшін үміткерлерді іріктеу қағидаларының 24-тармағы 5) тармақшасының Конституцияға сәйкестігін тексеруді сұрап, Конституциялық сотқа жүгінген.

Өтініш беруші "Болашақ" бағдарламасының түлектері оқуын аяқтағаннан кейін Қазақстан аумағында қызметін өтеуі керек деген талапқа келіспеушілік білдірген. Дәлел ретінде өтініш беруші еңбек қызметін қашықтықтан жүзеге асыру форматын көздейтін Еңбек кодексін келтірген. Өтініш берушінің пікірінше, қызметін өтеу үшін нақты Қазақстан аумағында болу шарт емес.

Конституциялық сот "Болашақ" бағдарламасы бойынша оқыту тараптардың өзара келісімі бойынша оқу басталғанға дейін жасалатын азаматтық шарт негізінде жүзеге асырылатынын еске салды. Мұндай келісім тараптардың, оның ішінде оқудан кейін тікелей Қазақстан Республикасының аумағында қызметін өтеу жөніндегі міндеттемелерді алдын ала ерікті түрде қабылдауын көздейді. Бұл шарт ережелерде ғана емес, білім туралы заңда да бар.

Осылайша, сот Қызметін өтеу жөніндегі ережелер нормасының Конституцияға сәйкестігін тексеру үшін негіздер жоқ деп таныды.