Алматыда танымал базар сүріліп жатыр

Алматыда сот шешімімен "Ақсай-4" шағынауданында орналасқан "Арыстан" базарының бір бөлігі сүріліп жатыр. Бұл туралы қала құрылысын бақылау басқармасына сілтеме жасаған KAZ.NUR.KZ хабарлайды.

Басқарманың мәліметінше, бұрындары жоспардан тыс жүргізілген тексеру барысында "Арыстан" базарының бір бөлігі еш рұқсат құжаттарынсыз тұрғызылғаны анықталған.

"Фирма Тигрохауд" ЖШС меншік иесіне қатысты әкімшілік шаралар қабылданды. Анықталған жайттарға байланысты басқарма аудандық сотқа заңсыз тұрғызылған базар алаңдарын бұзу туралы талап арыз жолдаған еді.

2024 жылғы 1 наурызда сот базардың ауданы 2125,62 шаршы метр болатын бір бөлігін бұзу туралы шешім шығарды, 2024 жылғы 19 шілдеде Алматы қалалық соты бірінші шешімді өзгеріссіз қалдырды", - делінген хабарламада.

Әділет департаментінің сот орындаушыларының қатысуымен сүру жұмыстары басталған.

Айта кетейік, бұған дейін әкімдік өкілдері "Теректі" шағынауданындағы тұрғын үй кешені бұзылып жатқанын хабарлаған еді.

Мәтіннен қате тапсаңыз, бізге жазыңыз