"Жолдан адасып кеткен": Алматы облысында таулы аймақта жоғалып кеткен 10 жасар бала аман-есен табылды

Алматы облысы Кеген ауданының тау жоталарында жоғалып кеткен 10 жасар бала аман-есен табылды, деп хабарлайды өңір әкімдігінің баспасөз қызметіне сілтеме жасаған KAZ.NUR.KZ.

Облыстық әкімдіктің баспасөз қызметінің мәліметінше, Кеген ауданының полицейлері мен құтқарушылары түні бойы Ақтасты ауылы маңындағы таулы аймақта жоғалып кеткен 10 жасар баланы іздестіріп, аман-есен тапқан.

Баланың жоғалып кеткені туралы хабарлама полицияға түн ортасында келіп түскен. Белгілі болғандай, бала туыстарымен бірге тауға саңырауқұлақ теруге шыққан. Кенет ол ересектерден қалып қойып, жолдан адасып кеткен. Жақындары өз күшімен іздеп көрген, алайда нәтиже болмаған соң құқық қорғау органдарынан көмек сұраған.

Кеген ауданының полицейлері мен құтқарушылары шұғыл түрде іздестіруді бастаған. Қиын жер бедеріне, түнгі уақыт пен аумақтың нашар көрінгеніне қарамастан, іздеу жұмыстарын тоқтатпаған.

Нәтижесінде бала таң ата аман-есен табылып, ата-анасымен қауышқан. Абырой болғанда ол ешқандай жарақат алмаған.

"Ең бастысы – бала аман-сау табылды. Мұндай жағдайда әр минут маңызды, біз әрқашан көмек көрсетуге дайынбыз", - дейді полицейлер.

Жақындары баласын іздестіруге атсалысқан құтқарушылар мен полицейлерге кәсібилігі мен жедел әрекеті үшін алғысын айтты.

Мәтіннен қате тапсаңыз, бізге жазыңыз