Сот 4 сағат жұмыста болмаған тараздық қызметкердің құқығын қорғады

Тараз қалалық сотында дәлелді себептерге байланысты жұмыс орнында болмағаны үшін қызметінен босатылған зауыт қызметкерінің арызы қаралды, деп хабарлайды соттың баспасөз қызметіне сілтеме жасаған KAZ.NUR.KZ.

Соттың баспасөз қызметінің мәліметінше, азамат С. шартты бұзу түрінде тәртіптік жаза қолдану туралы бұйрықты заңсыз деп тануды, оны бұрынғы лауазымына қалпына келтіруді, жұмысқа келмеуге мәжбүр болғаны үшін жалақы және моральдық зиянның орнын толтыруды сұрап, Тараз қалалық сотына жүгінген.

Белгілі болғандай, С. 2022 жылдың қараша айынан бастап "Қазфосфат ЖТК" ЖШС қоймасында оператор болып жұмыс істеген. 2023 жылдың қазан айында жұмыс беруші қызметкердің еңбек тәртібін бұзу туралы акт жасаған, атап айтқанда, дәлелді себептерсіз жұмыс орнында сағат 8:00-ден 12:00-ге дейін болмаған. Талап қоюшыға еңбек шартының бұзылғаны туралы хабарланған.

"Сот талап қоюшының жұмысқа бара жатқанда автокөліктің дөңгелегі жарылып, тұрақта тұрған автокөлікпен соқтығысып қалғанын анықтады, бұл туралы талап қоюшы дер кезінде өзінің тікелей басшыларына хабарлаған.

Ұсынылған хат-хабарлардың скриншоттарынан талап қоюшы екі тікелей бастығымен хабарласып, оларға жұмысқа уақтылы келмеу себебін түсіндірген. Бұл ретте бастықтарының бірі С.-ны жақсы қызметкер екенін көрсетіп, жақсы жағынан сипаттаған", - делінген хабарламада.

Ал жауапкер еңбек шартын бұзудың заңдылығына сілтеме жасай отырып, талап қоюды қанағаттандырудан бас тартуды сұраған.

Куәлердің, талап қоюшының айғақтарын және сотқа ұсынылған хат-хабарлардың скриншоттары мен автокөліктің фотосуреттерін ескере отырып, сот талап қоюшы жұмыс орнында болмау себептерін уақтылы хабарлады деген қорытындыға келген. Өндірісте қандай да бір тоқтап қалу және жұмыс берушіге залал келтірілмеген.

Сот талап қою арызын ішінара қанағаттандырып, бұйрықтардың күшін жойып, оны заңсыз деп таныған. Сот талап қоюшының жұмысын қалпына келтіріп, жұмысқа келмеуге мәжбүр болғаны үшін оған 1,4 млн теңге мөлшерінде жалақы және 500 мың теңге мөлшерінде моральдық зиян өтемақысын төлеу туралы шешім шығарған.

Сот шешімі заңды күшіне енген.

Мәтіннен қате тапсаңыз, бізге жазыңыз