Алтын Орда ханының тұсында құйылған: Атырау қаласының маңынан көне күміс тиындар табылды (фото)

Халел Досмұхамедов атындағы Атырау университетінің археологтары орта ғасырлық көне күміс тиындарды тапты. Археологиялық қазба жұмыстары Атырау қаласы маңындағы "Ақтөбе-Лаэти" қалашығында жүргізілген, деп хабарлайды Ғылым және жоғары білім министрлігіне сілтеме жасаған KAZ.NUR.KZ.

Министрліктің мәліметінше, табылған көне тиындар Жошы Ұлысында құрылған Алтын Орда мемлекетінің билеушісі Меңгу-Темір хан тұсында құйылған ақшалар тобына жатады.

Ресейлік нумизматика профессоры монетаның бедерлі таңбаларын оқып, құндылығын аса жоғары бағалаған.

"Бұл тиындар белгілі нумизматик ғалым Павел Николаевич Петровтың пайымдауынша ХІІІ ғасырдың екінші жартысына сәйкес келеді. Құйма ақшаның бір бетінде Меңгу-Темір ханның таңбалары, екінші жағында Қытай иероглифтері бейнеленген. Оның себебі Шыңғысханнан тараған Құбылай ұрпақтары мен Шағатай ұлысы арасында қақтығыстарда қолға түскен саяси тұтқын Номуханмен байланыстырады", - дейді археолог Амангелді Мұғауұлы.

Бұдан бөлек, қазба жұмыстары кезінде көрнекті артефакт "Тағара" ыдысы бүтін күйінде табылған.

Айта кетейік, бұған дейін Павлодар облысында көшпелі сақтардың пышақтары табылғанын, сондай-ақ Алматы облысында сақ дәуіріне тиесілі алтын жүзік табылғанын жазған едік.

Мәтіннен қате тапсаңыз, бізге жазыңыз