Қызылордада жақын арада жаңа стадион пайдалануға берілмек

Қызылордада жалпы ауданы 19 мың шаршы метрден асатын су жаңа стадион пайдалануға беріледі. Бұл туралы Қызылорда облысы әкімінің баспасөз қызметі хабарлады.

Мемлекет басшысы биыл Бурабайда өткен Ұлттық құрылтай отырысында халықтың спорттық инфрақұрылымдарға қолжетімділігін арттыру мақсатында облыс орталықтары мен аудандарда заманауи стадиондар мен спорт кешендерін салу мәселесіне ерекше тоқталған болатын.

Бұл ретте ел президенті және үкіметтің ерекше қолдауымен аймақ басшысы Нұрлыбек Машбекұлының бастамасымен былтыр Қызылорда қаласының сол жағалауында құны 20,9 млрд теңгені құрайтын 11 мың орындық жаңа стадионның құрылысы басталған болатын. Бас мердігер - "ВД Строй Инжиниринг" ЖШС. Стадионның жалпы ауданы – 19 942,9 шаршы метр.

Бұл стадион халықаралық стандарттарына сай салынып жатқандықтан әлемдік додаларды жоғары деңгейде өткізуге мол мүмкіндік береді.

Бірегей нысанда жасыл алаңнан бөлек, олимпиадалық спорт түрлеріне арналған бокс залы, күрестің үш түріне арналған атап айтқанда дзюдо, грек-рим, еркін күрес залы, фитнес залы, спорттық гимнастика, таеквондо және ауыр атлетика залдары қамтылатын болады. Аталған спорттық залдар жыл он екі ай көлемінде спорт сүйер қауым үшін сапалы қызмет ететін болады.

Жаңа стадионның тағы бір ерекшелігі – УЕФА Классификациясы бойынша ІІІ санатты. Сонымен қатар, халықаралық деңгейдегі "Фелипс" компаниясының өнімдері арқылы жарықтандырылатын болады. Бұл өз кезегінде, түрлі деңгейдегі мәдени-спорттық іс-шараларды және футбол матчтарын жоғары деңгейде өткізуге мол мүмкіндік бермек. Бұдан бөлек, жанкүйерлерге арналған "Қайсар" футбол клубының жабдықтарын сататын арнайы дүкен және дәмхана қарастырылмақ.

Стадиондағы жасыл алаң облыстың климаттық ерекшелігі ескеріле отырып, озық технологиялардың көмегімен төселетін болады. Тиісінше, жасыл алаңға керекті шикізат көлемі дамыған озық мемлекеттерден әкелінді. Сондай-ақ ойыншыларға қолайсыздық тудырмау мақсатында футбол алаңының астыңғы қабатына жылыту желілері жүргізілді, бұдан кейін жасанды көгалдың астына 2 см болатын "shockpad" амортизациялық төсем қапталады. Бұл технология "Astana Arena" және Қызылордадағы жаңа стадионда ғана енгізілген. Осылайша заманауи үлгіде жабдықталған 11 мың орындық жаңа стадион халықаралық жарыстарды өткізуге толық мүмкіндік береді.

Аталған нысанды осы жылдың қыркүйек айында пайдалануға беру жоспарлануда.

Мәтіннен қате тапсаңыз, бізге жазыңыз