Астанадағы көшелердің бірі 27 тамызға дейін жабық болады

Астана әкімдігі елорда тұрғындары мен қонақтарына жақын күндері Қажымұқан Мұнайтпасов көшесінде көлік қозғалысына шектеу қойылатынын ескертті, деп хабарлайды KAZ.NUR.KZ.

Астана қаласының Көлік және жол-көлік инфрақұрылымын дамыту басқармасы қала тұрғындары мен қонақтарын биыл 16-27 тамыз аралығында Тәуелсіздік даңғылынан М. Жұмабаев даңғылына дейінгі учаскеде Қажымұқан Мұнайтпасов көшесіне орташа жөндеу жұмыстары жүргізілетіні туралы хабардар етті. Осы уақытта автокөлік құралдарының қозғалысы екі бағытта бір жағынан кезең-кезеңімен ұйымдастырылады.

"Жүргізушілер мен жаяу жүргіншілерден маршруттарды алдын ала жоспарлауды және қозғалысты ұйымдастырудағы ықтимал өзгерістерді ескеруді сұраймыз. Қауіпсіздікті қамтамасыз ету және қолайсыздықты азайту үшін уақытша жол белгілері мен көрсеткіштер орнатылатын болады.

Осы өзгерістерге түсіністікпен қарауды және қала бойынша қозғалыстарды жоспарлау кезінде оларды алдын ала ескеруді сұраймыз", - делінген хабарламада.

Мәтіннен қате тапсаңыз, бізге жазыңыз