Алматының бірнеше ауданы жарықсыз қалды

Бүгін, 3 қыркүйекте Алматының кейбір шағын аудандары жарықсыз қалды. Оқиға орнында "АЖК" АҚ бригадалары жұмыс істеп жатыр, деп компанияның баспасөз қызметіне сілтеме жасаған KAZ.NUR.KZ хабарлайды.

"Алатау Жарық Компаниясы" АҚ баспасөз қызметінің ақпаратына сәйкес, бүгін 14:25-те Медеу, Бостандық және Әуезов аудандарында электр жарығы апатты жағдайда сөндірілді.

"Аудандардың жарықсыз қалуына кабельдік желілердегі апатты жағдай себеп болған. Нәтижесінде Достық, Қарғалы, Архат, Ғаламат, Жайлау шағын аудандары мен Гурилев, Теміртау және Блок көшелері уақытша жарықсыз қалды", - деп мәлімдеді компания өкілдері.

Авариялық-қалпына келтіру жұмыстарына 8 жедел бригада, кабельдік желілерді жөндейтін бригада, арнайы техника жұмылдырылды. Оған қоса электролабораториялар жұмыс істеп жатыр. 18:00-ден бастап тұтынушыларға уақытша электр жарығын беру жүзеге асырылып жатыр.

"АЖК" АҚ уақытша ыңғайсыздық үшін кешірім сұрайды. Біз электр жарығын қалпына келтіру үшін қажетті шараларды іске асырып жатырмыз", - делінген хабарламада.

Мәтіннен қате тапсаңыз, бізге жазыңыз