Алматы полициясы Backstreet Boys тобының концертіне байланысты мәлімдеме жасады

Алматыда Backstreet Boys тобының концерті кезінде қоғамдық тәртіп пен жол қауіпсіздігін қамтамасыз етуге 2,5 мыңға жуық полиция қызметкері жұмылдырылады. Бұл туралы қалалық полиция департаментіне сілтеме жасаған KAZ.NUR.KZ хабарлайды.

Полицияның мәліметінше, концертке көптеген адам келеді деп күтіліп отыр. Осыған байланысты полицияның кешенді күштерінің кезекшілігі күшейтіледі.

Қоғамдық тәртіпті сақтау, құқықбұзушылықтардың алдын алу және көлік қозғалысын реттеу мәселелеріне ерекше көңіл бөлінеді.

Сондай-ақ кептелістердің алдын алу және арнайы көліктердің еркін қозғалысын қамтамасыз ету мақсатында Абай даңғылы – Байтұрсынов, Мұқанов және Сәтбаев көшелері шеңберінде автокөлік қозғалысына ішінара шектеу қойылуы мүмкін.

"Алматы қалалық полиция департаменті, қала тұрғындарын, осы ақпаратты бағыттарын жоспарлау кезінде ескеруге, қоғамдық тәртіпті сақтауға және полиция қызметкерлерінің нұсқауларын орындауға шақырады", - делінген хабарламада.

Айта кетелік, Backstreet Boys тобының Алматыдағы концерті бүгін, 19 қыркүйекте Орталық стадионда өтеді.

Осыған дейін әйгілі америкалық топты Алматыда қалай қарсы алғанын жазған едік. Сондай-ақ топтың солисі Қазақстаннан алған әсерін бөліскен еді.

Мәтіннен қате тапсаңыз, бізге жазыңыз