Ең үлкені – 115-те: Қазақстанда 100 жастан асқан қанша азамат бар

Еңбек және халықты әлеуметтік қорғау министрлігі Қазақстанда 100 жастағы және 100-ден асқан қанша азамат бар екені туралы деректерді жариялады, деп хабарлайды KAZ.NUR.KZ.

Ведомствоның мәліметінше, елімізде 100 жастағы және 100-ден асқан 448 азамат бар. Ең жасы үлкен тұрғын Ұлытау облысында тұрады. Ол – 115 жаста.

100 жасқа толғандардың ең көп саны еліміздің ең ірі қаласы Алматыда тұрады, онда 100 және одан жоғары жастағы 58 адам бар.

Ұзақ өмір сүрушілер саны бойынша екінші орында – Түркістан облысы. Онда 100 жастан асқан 53 адам тұрады.

Ұзақ өмір сүретіндер саны бойынша үшінші орында Алматы облысы тұр, онда 100 және одан жоғары жастағы 37 адам бар.

Ең қарт қазақстандықтардың үштігіне Ұлытау облысының тұрғыны – 115 жас, Павлодар облысы – 113 жас, Жамбыл облысы – 110 жас кірді.

Айта кетейік, жыл сайын бүкіл әлемде, оның ішінде Қазақстанда да 1 қазанда Халықаралық қарттар күні атап өтіледі. Бұл мерекені 1990 жылғы 14 желтоқсанда Біріккен Ұлттар Ұйымының Бас Ассамблеясы 45-сессияда бекітті.

Қарттар күнін атап өтудің басты мақсаты – егде жастағы адамдардың мемлекет пен қоғам алдындағы еңбегін құрметтеу және тану, сондай-ақ олардың проблемалары мен қажеттіліктеріне, өмір сүру сапасын арттыру қажеттілігіне назар аудару, оларға жалпыға бірдей қамқорлық көрсету.

Мәтіннен қате тапсаңыз, бізге жазыңыз