Тұман, көктайғақ, -12 градусқа дейін суық: қазанда Қазақстанда ауа райы қандай болады

Синоптиктер қазан айында ел аумағында күн райы қандай болатынын болжады, деп хабарлайды "Қазгидромет" РМК-ға сілтеме жасаған KAZ.NUR.KZ.

Метеорологтардың мәліметінше, солтүстік-батыс антициклонымен байланысты қыркүйек айының соңындағы суық ауа райы қазан айының басында да сақталады. Қазақстанның басым бөлігінде түнгі уақытта температуралық фон -1-6°С, күндіз +2+9°С аралығында болады.

Бірақ бірінші онкүндіктің екінші жартысында Орталық Азия мен Жерорта теңізінің шығыс жағалауынан келетін жылы ауа массаларының әсерінен түнгі және күндізгі уақытта температураның жоғарылауы күтіледі:

• елдің батысында түнде +7+12°С-қа дейін күндіз +17+25°С-қа дейін;
• солтүстігінде, шығысында түнде +2+8°С-қа дейін, күндіз +10+18°С-қа дейін;
• республиканың шығысында түнде +2+7°С-қа дейін, күндіз +15+23°С-қа дейін;
• оңтүстігінде, оңтүстік-шығысында түнде +5+12°С-қа дейін, күндіз +20+28°С-қа дейін жылы болмақ.

Онкүндіктің соңында Қазақстанның солтүстік-батыс жартысында ауа температурасының шамалы төмендеуі күтіледі. Елдің оңтүстік жартысы мен шығысына бұл суық толқын екінші онкүндіктің басында келеді.

Екінші онкүндікте республиканың басым бөлігінде қайтадан күн жылынып, ауа температурасы күндіз +13+18°С-қа дейін, оңтүстікте, оңтүстік-шығыста +22+27°С-қа дейін жоғарылайды.

Үшінші онкүндікте ауа температурасы төмендеуі ықтимал. Түнде жекелеген күндерде ауа температурасының -1-6°С-қа дейін, Қазақстанның солтүстік, орталық және шығыс өңірлерінде -7-12°С-қа дейін, күндіз 0,+8°С-қа дейін төмендеуі күтіледі. Елдің оңтүстік жартысында ауа температурасының түнде -1-6°С-тан +3+8°С-қа дейін, күндіз +5+13°С-тан +13+20°С-қа дейін ауытқуы болжанады.

Бұдан бөлек, қазан айында ел аумағында тұман, көктайғақ, екпінді жел күтіледі, айдың екінші жартысында республиканың солтүстік жартысында жаяу бұрқасын болуы ықтимал.

Мәтіннен қате тапсаңыз, бізге жазыңыз