RU

"Тоқтауға болмайды": Мырзағали Айтжанов Бибосыновтың жекпе-жегіне баға берді

Сәкен Бибосынов
Сәкен Бибосынов. Фото: t.me/olympickz

Бокстан Токио Олимпиадасының жартылай финалында бақ сынайтын жалғыз қазақстандық боксшы қалды. Ол – Сәкен Бибосынов. Спортшының жеке бапкері Мырзағали Айтжанов ширек финалдық жекпе-жекті қорытындылап, алдағы кездесуге қатысты ойын айтты деп жазады Olympic.kz. 

Мырзағали Айтжанов Олимпиадада өнер көрсетіп жатқан шәкіртінің жекпе-жектеріне өз бағасын берді. Ол Сәкен Бибосынов жүлдегерлер қатарында болса да, мұнымен тоқтап қалмай алға басу керектігін айтты.

"Олимпиададағы әрбір жеңіс оңайлықпен келмейді. Кешегі жеңіс те үлкен күшті талап етті. Сәкен жүлдегер қатарында бар, бірақ, мұнымен тоқтамай, алға басу керек. Ширек финалдық кездесуде оның кішігірім қателіктері болды. Қолмен жұмыс істемей, бір орында тұрып қалды. Енді біз осы қателіктерді келесі жекпе-жекте жібермеуге тырысамыз. Шаршы алаңды сезіну керек. Қай деңгейдегі боксшылар болса да, шаршы алаңға шыққанда барлығы да тең.
Сондықтан, кез келген ел жеңіске жеткісі келеді. Кез келген жеңіс біз үшін мақтаныш. Екінші раундтан соң оны жігерлендіру керектігін түсіндім. Мұнда не үшін келгенін айттым. Бар күшімен ұрып, қолынан келгенін аянбауын сұрадым. Керек болса, төбелес дедім. Әр адамның бокстасу мәнері әртүрлі, егер қарсыласың «лас» ойын көрсетсе, оған да бейімделу керек. Сәкен келесі қарсыласын да таниды. Біз оған тыңғылықты дайындаламыз. Бәрін шаршы алаң көрсетеді" , - деді Айтжанов. 

Мақаланың түпнұсқасы: https://kaz.nur.kz/sport/1925578-toqtauga-bolmaidy-myrzagali-aitzanov-bibosynovtyn-zekpe-zegine-baga-berdi/