Бақыт Ахметов ауыр атлетикадан Қазақстан ұлттық құрамасының бас бапкері қызметінен босатылды. Бұл туралы ауыр атлетика федерациясының ресми сайтында хабарланды.
Федерацияның мәліметінше, шешім ауыр атлетикадан ұлттық құраманың жаттықтырушылар штабына қатысты атлеттер мен жаттықтырушылардан түскен шағымдарды қарағаннан кейін қабылданған.
"Федерация Ұлттық Олимпиада комитетімен бірлесіп, ауыр атлетикадан Қазақстан Республикасының алдағы чемпионаты кезінде ұлттық құрама команданың жаттықтырушылар штабына үміткерлерді іріктеуді осы мақсаттар үшін әзірленген критерийлер негізінде жүргізуге ниетті", - деп қосты ауыр атлетика федерациясы.
Еске салсақ, 17 қыркүйек күні талантты спортшы, ауыр атлет, ауыр атлетикадан Қазақстан және Азия чемпионы Альберт Линдер 25 жасында өмірден өткен болатын.
Жас спортшының өлімінен кейін қазақстандық ауыр атлеттер баспасөз конференциясын өткізіп, Альбертке бапкері Сергей Седов қысым көрсеткенін мәлімдеген.
Кейінірек, ауыр атлетика федерациясы арнайы комиссия құрып, Сергей Седов қызметінен шеттетілген еді.
Альберт Линдердің өліміне қатысты Алматы облысының полиция департамендінде қылмыстық іс қозғалды.
Мақаланың түпнұсқасы: https://kaz.nur.kz/sport/other-sports/1937789-auyr-atletikadan-qazaqstan-ulttyq-quramasynyn-bas-bapkeri-qyzmetinen-bosatyldy/
