Футзалдан Қазақстан құрамасының бас бапкері коронавирус жұқтырып алды

Футзалдан Қазақстан құрамасының бас бапкері Рикардо Какадан Нидерландыда өтетін Еуро-2022 қарсаңында коронавирус анықталды.

Бұл туралы футзалдан Қазақстан құрамасы Instagram желісіндегі ресми парақшасында хабарлады.

Құраманың мәліметінше, бас бапкер Рикардо Кака мен футзалшы Арнольд Кнаубтан алынған ПТР-тест оң нәтиже көрсеткен.

Салдарынан Кака мен Кнауб Еуропа чемпионатындағы Словениямен өтетін алғашқы ойынға қатыса алмайды.

Матч бейсенбі, 20 қаңтар күні астана уақытымен 22:30-да басталады. Команданы ойынға бас бапкердің көмекшісі Сергей Коридзе бастап шығады.

Еске сала кетсек, бұған дейін "ПСЖ" клубының футболшы Лионель Мессидің коронавирус жұқтырып алғанын жазған едік.

Одан бөлек, команданың тағы үш ойыншысынан - Хуан Бернат, Серхио Рико мен Натан Битюмазаладан да COVID-19 анықталған.