"Үш отандасымыз ширек финалда": Бүгін шорт тректен жүлдегерлер анықталады

Опубликовано:

Спортшы
Фото: Ұлттық Олимпиада комитеті

Бүгін Бейжің Олимпиадасында шорт-тректен 500 метрге жарысудан жеңімпаздар мен жүлдегерлер анықталады. Іріктеу кезеңінен кейін қазақстандық үш спортшы ширек финалға жолдама алған болатын. Маңызды жарыс алдында бапкер мен шорт трекшілер дайындықтарын пысықтады, деп жазады Ұлттық Олимпиада комитеті.

Шорт-тректен 500 метрге жарысушылар арасындағы іріктеу сыны 11 ақпанда өтті. Ал Олимпиаданың ашылу салтанатында еліміздің көк байрағын алып шыққан Абзал Әжіғалиев үшін бұл маңызды дата еді. Себебі, спортшы алты күн бойы айдынға шығатын сәтін асыға күтті. 

"Мен Олимпиадада тек қана 500 метрде бақ сынаймын. Бұған дейін барлық спортшылар өз қашықтықтары бойынша жарысқа қатысып, мұз айдынын сезініп үлгерді. Ал мен 4 ақпаннан бері өз кезегімді күттім. Іріктеуді сәтті аяқтап, ширек финалға жолдама алдым. Енді алдағы сайыстарда маған сәттілік тілеп қойыңыздар", - деді Абзал. 

Айта кетелік, Абзал Әжіғалиев дәл осы қашықтықта әлем кубогі кезеңдерінен жүлде алған спортшы. Ол Бейжің Олимпиадасында тек қана 500 метрлік жарыста сынға түседі.

1500 метрге жарысудан Олимпиаданың финалында өнер көрсетіп, үздік сегіздікке енген Әділ Ғалиахметов те ширек финалға жолдама алды.

"Мен негізінен ұзақ қашықтықтарға жүгіремін. Сондықтан, 500 метр аздап қиынға соқты. Бапкерлер маған қытайлық спортшыны ұзатып алмауды тапсырған. Канадалық спортшы құлап қалған соң, екінші орынды қолдан бермеуге тырыстым. Сол кезде ғана өзімді бос ұстап, жағдайды дұрыс бақыладым. Алдағы ширек финалда барынша жақсы өнер көрсетуге тырысамын", - деді іріктеуден кейін сөз алған спортшы. 

Әділдің аяқ алысында спорт мамандары жоғары баға беруде. Әсіресе, Олимпиаданың қола жүлдегері, ресейлік Семен Елистратов оралдық спортшының көзі жалын атып тұрғанын айтады. Ең алғашқы Олимпиадасында финалға шығып, әлем үздіктерімен иық тірестірген Әділден бүгін де ерлік күтеміз. 

500 метрге жүгіруден биылғы маусымды сәтті бастаған спортшылардың бірі  - Денис Никиша. Денис Олимпиадаға дейін әлем кубогінің екі кезеңінде қола медаль иеленіп, рейтингтегі жағдайын да жақсартқан болатын. Бейжіңдегі іріктеу сынында Никиша өз тобында бірінші келді. 

"Іріктеуде бәрі өз ойлағанымдай болды. Алға қойған мақсатты орындадық. Ширек финалда жинақы өнер көрсетуіміз керек. Мен тап осы 500 метрге дайындалдым. Бұл қашықтықта өзімді еркін сезінемін. Қарсыластарды да жақсы білемін. Енді алдағы бәсекелерге дайындаламын", - дейді Денис. 

Бас бапкер Мәдіғали Қарсыбеков үшеуінің де ширек финалға өткенін қалыпты жағдай деп бағалады. 

"Үш спортшымыз да ширек финалға өтті. Ендігі мақсат – финалға дейінгі екі кезеңнен сәтті өту. Қалғанын жағдайға байланысты көре жатамыз. Бір қуантқаны – Абзал Әжіғалиев бабында", - деп қысқа қайырды ол.

Шорт-тректен 500 метрге жарысудан ширек финал, жартылай финал және финалдық кезең Нұр-Сұлтан уақытымен 17:00-де басталады. 

Мақаланың түпнұсқасы: https://kaz.nur.kz/sport/1955878-us-otandasymyz-sirek-finalda-bugin-sort-trekten-zuldegerler-anyqtalady/