Ерлер арасында хоккейден Бейжің Олимпиадасының финалына шыққан құрамалар анықталды. Олардың бірі Ресей, деп хабарлайды KAZ.NUR.KZ тілшісі.
Ресей құрамасы жартылай финалда Швециямен кездесті. Тартысты өткен матчтың негізгі уақытында 1:1 есебі тіркеліп, кездесу қосымша уақытпен жалғасты. Овертаймда бір-бірінің қақпасынан саңылау таба алмаған ұжымдар жеңімпазды анықтай алған жоқ.
Осылайша, буллит сериясына кезек берілді. Бұл сында ресейлік хоккейшілердің мерейі үстем болды (3:2).
Ал жартылай финалдың екінші ойынында Финляндия Словакиядан айласын асырды. Есеп 2:0.
Осылайша, ақтық мәреде Ресей мен Финляндия жолығады. Финал 20 ақпан күні Нұр-Сұлтан уақытымен 10.00-де өтеді деп жоспарланып отыр.
Айта кетейік, ертең, 19 ақпанда қола медальға Швеция мен Словакия таласады. Матч 19.10-да басталады.
Мақаланың түпнұсқасы: https://kaz.nur.kz/sport/hockey/1956887-xokkeiden-resei-quramasy-beizin-olimpiadasynyn-finalyna-syqty/
