2027 жылы Қазақстанда хоккейден әлем чемпионаты өтуі мүмкін (фото)

Опубликовано:

хоккей
Хоккейден Қазақстан ұлттық құрамасы. Фото: Ольга Бугаева

Мемлекет басшысы Қасым-Жомарт Тоқаев Халықаралық хоккей федерациясының президенті Люк Тардифті қабылдады. Кездесуде хоккей спортын дамытудың және кеңінен танытудың перспективалары, сондай-ақ елімізде ірі халықаралық турнирлер өткізу мәселесі талқыланды, деп хабарлайды Ақорда.

Президент баспасөз қызметінің хабарлауынша, Қасым-Жомарт Тоқаев Люк Тардифке Қазақстан хоккейінің жетістіктері, отандық спортты дамыту үшін қабылданып жатқан шаралар мен спорт инфрақұрылымының мүмкіндіктері туралы айтқан.

Мемлекет басшысы елімізде хоккей спортына қызығушылық артып келе жатқанын, балалар мен жасөспірімдерге арналған хоккей мектептері мен жастар командаларының саны көбейгенін атап өткен. Бүгінде спорттың осы түрімен 14 мың аса адам шұғылданады.

Кездесу барысында спорт инфрақұрылымдарының мүмкіндіктеріне ерекше назар аударылды.

Тоқаев
Фото: Ақорда

Осы ретте президент еліміздің 2027 жылы әлем чемпионатын өткізуге жолдаған өтінімі 2023 жылы мамырдағы дауыс беру кезінде қолдау тапса, Қазақстанның осы шараны ұйымдастыруға дайын екенін айтты.

Қасым-Жомарт Тоқаев Халықаралық хоккей федерациясы өз тарихында Азия құрлығында ешқашан жоғары деңгейдегі чемпионаттар өткізбегенін атап өтті.

Халықаралық хоккей федерациясының президенті кездесуге мүмкіндік бергені үшін Мемлекет басшысына алғыс айтып, Қазақстанда хоккей спортын дамытуға көңіл бөлініп жатқанын жоғары бағалады. Сондай-ақ еліміз халықаралық жарыстарды өте жоғары деңгейде өткізуге қажет барлық инфрақұрылымға ие екенін жеткізді.

Мақаланың түпнұсқасы: https://kaz.nur.kz/sport/1987939-2027-zyly-qazaqstanda-xokkeiden-alem-cempionaty-otui-mumkin-foto/