Спорттық биден әлем чемпионатында Қазақстанның әнұраны ауысып кетті (видео)

Опубликовано:

Максим Жиленков пен Арина Молочникова
Максим Жиленков пен Арина Молочникова. Фото: ballroom.kz

Спорттық биден Латвияның Саласпилс қаласында өткен әлем чемпионатында Қазақстан тұңғыш рет алтын алды. Максим Жиленков пен Арина Молочкова бірінші орын иеленіп, жеңіс тұғырына көтерілді. Алайда марапаттау рәсімінде Қазақстанның ескі әнұраны қосылған, деп хабарлайды KAZ.NUR.KZ.

Бұл ел тарихында спорттық биден иеленген алғашқы алтын жүлде. Алайда спортшыларды марапаттау кезінде осыдан 16 жыл бұрынғы әнұран шырқалды. Спортшылар да бұл сәтті түсінбей қалған.

Журналист Айдос Рымқұл әнұранның ауысуы жиі қайталанатынын қатаң сынға алып, Facebook желісінде жазба қалдырды.

"Латвияда спорттық биден әлем чемпионаты өтіп жатыр. Аталған жарыста жастар арасында сынға түскен отандастарымыз Максим Жиленков пен Арина Молочникова спорттық бидің қоссайыс түрінде қарсылас шақ келтірмей, әлем чемпионы атанды.

Десе де марапаттау салтанатында масқара жағдай болды. Еліміздің қазіргі гимнінің орнына 1991-2006 жылға дейінгі гимніміз ойналды. Әнұранның ауысқанына 16 жыл болса да, масқара жағдай қайталануда. Оған жауапты спорт функционерлеріне де бәрібір сияқты.

Қайбір жылы мен Спортты дамыту дирекциясында жұмыс істегенде шетелдік жарысқа шыққан әрбір командаға еліміздің гимні мен көк туын қосып жіберу баспасөз хатшысының мойнында болатын. Қазір қалай екенін білмеймін, десе де сұмдық мынау", - деп жазды журналист.

Латвиядағы әлем чемпионатында 32 ел спортшылары бақ сынауда.

Мақаланың түпнұсқасы: https://kaz.nur.kz/sport/1998495-sporttyq-biden-alem-cempionatynda-qazaqstannyn-anurany-auysyp-ketti-video/