Бүгін блиц шахматтан 2 дүркін Әлем чемпионы Бибісара Асаубаева мен анасы, әрі жеке бапкері Лиана Таңжарықова Астана қаласына келді, деп хабарлайды KAZ.NUR.KZ тілшісі Спортты дамыту дирекциясына сілтеме жасап.
Желтоқсан айында Алматыдағы Әлем чемпионатында топ жарған спортшыны әуежайдан БАҚ өкілдері, шахматтан Ұлттық құраманың бас бапкері Павел Коцур мен Спортты дамыту дирекциясының ресми өкілдері күтіп алған.
Журналистер сұрағына жауап берген шахматшы биылғы жоспары жайлы айта кетті.
"Биыл бірқатар маңызды маңызды жарыста өнер көрсетемін. Әлемдік Гран-Прилер сериясы, Әлем Кубогы мен Әлем чемпионатында жақсы нәтиже көрсетуге тырысамын. Алғашқы жарысым наурыздағы Гран-Придің келесі кезеңі. Сондай-ақ күзде Қытайда өтетін Азия ойындарына да қатысу жоспарда бар", - деді Бибісара Асаубаева.
Айта кетейік, 2022-2023 жылғы маусымдағы әйелдер арасындағы ФИДЕ Гран-Приінің алғашқы кезеңі былтыр қыркүйекте Астана қаласында өткен. Таңдаулы 12 шахматшының арасында Жансая Әбдімәлік бесінші, ал Бибісара Асаубаева оныншы орынға тұрақтаған.
Енді Гран-Придің 2-кезеңі ақпан айында Мюнхен (Германия) қаласында өтсе, 3-кезеңді Үндістан қабылдайды. Ал соңғы, 4-кезең Польшаның Быдгош қаласында ұйымдастырылады.
Мақаланың түпнұсқасы: https://kaz.nur.kz/sport/other-sports/2005563-almatydagy-alem-birinsiliginde-zenimpaz-atangan-bibisara-asaubaeva-aldagy-zosparymen-bolisti/
