Бокстан Ташкентте өтіп жатқан әлем чемпионатында Моңғолия намысын қорғайтын Бекнұр Қалиұлын ұйымдастырушылар жарысқа жібермей қойған. Бұл туралы журналист Анық Көкенайұлы хабарлады, деп жазады KAZ.NUR.KZ.
Бекнұр Қалиұлы +92 келі салмақта өнер көрсететін боксшы. Алайда журналистің мәліметінше, ұйымдастырушылар Бекнұрды басқа салмаққа тіркеп қойған.
"Жеребе күні IBA өкілдері Бекнұрды -92 келі салмаққа тіркеп, жібермеген. Мұны Моңғолия құрамасының бапкерлері байқамай қалыпты. Бапкерлер Бекнұрды ауыр салмақтың ішінен іздеген, таба алмаған. Салмағы 100 келіден жоғары боксшы 2-3 күнде 92 келіге дейін салмақ қуа алмайды ғой. Сол себепті шықпаған.
IBA-ның қателігі болды ма? Әлде Моңғолия бапкерлерінің бе?", - деп жазды Анық Көкенайұлы.
Осыған қатысты спорт журналисі Уәлихан Қосанбай да пікір білдірді.
"Егер Қалиұлы аса ауыр салмаққа тіркелгенде Қамшыбек Қоңқабаев үшін де басқаша болар еді", - деп жазды Уәлихан.
Айта кетелік, қазақстандық Қамшыбек Қоңқабаев пен оның басты қарсыласы Бахадор Жалолов турнирдің ширек финалында кездесуі мүмкін.
Егер Бекнұр жарысқа жіберілгенде, жеребе әлдеқайда басқаша түсетін еді.
Мақаланың түпнұсқасы: https://kaz.nur.kz/sport/boxing/2019711-kimnin-qateligi-mongoliya-namysyn-qorgaityn-qazaq-bokssysyna-qatysty-zana-derekter-belgili-boldy/
