Ертең, 12 мамырда бокстан Ташкентте өтіп жатқан әлем біріншілігінің жартылай финалы басталады, деп хабарлайды KAZ.NUR.KZ тілшісі.
Жартылай финалға Қазақстан құрамасының 5 боксшысы шықты. Олар: Санжар Тәшкенбай, Махмұд Сабырхан, Дулат Бекбауов, Асланбек Шымбергенов және Нұрбек Оралбай.
Бұл көрсеткіш бойынша Қазақстан құрамасы үшінші сатыға жайғасқан.
Көш басында Өзбекстан құрамасы тұр. Жарыс қожайындарының тоғыз боксшысы жартылай финалға жолдама алған. Екінші сатыда Куба мен Ресей (6 боксшы).
Сонымен қатар Ташкенттегі байрақты бәсекенің 1/2 финалында Грузия, Франция, Испания және Үндістанның үш боксшысы өнер көрсетпек.
Айта кетейік, бокстан Ташкентте өтіп жатқан әлем чемпионаты 14 мамыр күні аяқталады. Байрақты бәсекеге Қазақстан намысын қорғау үшін 13 боксшы аттанып, оның сегізі жарыс жолынан шығып қалды. Жүлдесіз қалған спортшылардың қатарында Қамшыбек Қоңқабаев, Сәкен Бибосынов, Серік Теміржанов, Санатәлі Төлтаев, Сағындық Тоғамбай, Талғат Сырымбетов, Айбек Оралбай және Нұрқанат Райыс бар.
Мақаланың түпнұсқасы: https://kaz.nur.kz/sport/boxing/2020177-alem-cempionaty-zartylai-finalga-syqqan-bokssylardyn-sany-zoninen-qazaqstan-nesinsi-orynda/
