Бокстан Қазақстан құрамасы Алматы облысында оқу-жаттығу жиынын өткізіп жатыр. Бұл туралы KAZ.NUR.KZ тілшісі хабарлайды.
Бокс федерациясының хабарлауынша, жиырма күндік оқу-жаттығу жиынынан соң боксшылар үйлеріне қайтады. Бірнеше күн демалыстан кейін Азия чемпионатына бағытталған соңғы дайындық кезеңі басталады.
"Қайрат Сәтжанов бастаған бапкерлік құрамның және америкалық мамандардың нұсқауымен жаңа форматтағы жаттығулар сериясы жүргізілді", - делінген федерация хабарламасында.
Бокстан Азия чемпионаты 30 қараша мен 12 желтоқсан аралығында Иорданияның Амман қаласында өтеді. Бұл жарысқа боксшыларды іріктеу үшін Шымкентте Қарақозы Әбдәлиевті еске алуға арналған халықаралық турнир ұйымдастырылған болатын.
Еске салайық, Қазақстан бокс федерациясы World Boxing ұйымының толыққанды мүшесі атанған еді. Сондай-ақ федерация Лос-Анджелестегі Олимпиада ойындарына іріктеу турнирі ретінде cаналатын 2027 жылғы әлем чемпионатын өткізуге өтінім берді.
Мақаланың түпнұсқасы: https://kaz.nur.kz/sport/boxing/2184281-amerikalyq-mamandardyng-nusqauymen-qazaq-boksshylary-zhanga-formatta-zhattygu-otkizdi-video/
