Бокстан әлем чемпионы Асланбек Шымбергенов Париж Олимпиадасындағы сәтсіздіктен соң алғаш рет журналист Ақырыс Сейтқазының YouTube арнасына сұхбат берді. Боксшы жазғы ойындардағы жеңілісінің себебін түсіндірді.
"Олимпиаданың алдындағы оқу-жаттығу жиынында ауырып қалдым. Температурам бір апта бойы түспей қойды. Ондай жағдай менде мүлде болмаған. Әрі кетсе, бір-екі күн ауырып, қоятынмын. Бұл да Париждегі жеңіліске себеп болды деп ойлаймын. Жеңілісті өзі солай алып келеді ғой. Өзің сезесің. Ауырасың, жаттығуың дұрыс болмай қалады. Сондай болады өзі", - деді Шымбергенов.
Сондай-ақ Асланбек Олимпиададағы сәтсіздіктен соң ешқандай да депрессияға түспегенін, мұны сынақ деп қабылдағанын айтты.
"Психологпен сөйлескенімде, ол: "Депрессияға түстің бе?", - деп сұрады. "Палестинада соғыс болып жатыр ғой. Алла сондай сынақ беріп жатыр. Соған олар шыдап жатыр. Ал болмайтын жекпе-жек үшін депрессияға түседі деп ойлайсыз ба?", - дедім. Әрине, қиындықтар болды. Бірақ халықтың, жақындарымның, отбасымның, достарымның арқасында бұл сәт алыста қалды", - дейді боксшы.
Мақаланың түпнұсқасы: https://kaz.nur.kz/sport/boxing/2238732-zhengiletinimdi-sezdim-aslanbek-shymbergenov-olimpiadadan-keiin-algash-ret-suhbat-berdi/
