Дзюдодан Қазақстан чемпионаты аяқталды: қай өңірдің спортшылары көш бастады

Ақтөбеде дзюдодан ерлер және әйелдер арасында өткен Қазақстан чемпионаты мәресіне жетті. Біріншіліктің қорытындысы бойынша Ақтөбе облысының дзюдошылары көш бастады, деп KAZ.NUR.KZ Қазақстан дзюдо федерациясының баспасөз қызметіне сілтеме жасап хабарлайды.

Ақтөбеде дзюдодан ерлер және әйелдер арасында Қазақстан Республикасының чемпионаты өз мәресіне жетті. Чемпионаттың жекелей сынына Астана, Алматы, Шымкент қалалары мен еліміздің 17 облысынан барлығы 510 дзюдошы қатысты.

Жекелей жарыс нәтижесі бойынша жалпы медаль кестесінде 3 алтын, 1 қола жүлдемен Ақтөбе облысының спортшылары көш бастады. Қоржынында 2 алтын, 3 күміс және 2 қоласы бар Абай облысы медаль кестесінде екінші орынға жайғасса, 2 алтын, 1 қола жүлдемен Астана қаласының құрама командасы үздік үштікті түйіндеді.

Сондай-ақ ел чемпионатының соңғы күнінде аралас-командалық жарыстар бойынша үздіктер анықталды. Өте тартысты өткен финалдық кездесуде Алматы қаласының спортшылары Алматы облысының дзюдошыларын 4:2 есебімен жеңіп, Қазақстан чемпионы атағына ие болды. Финалист Алматы облысы екінші күміске қол жеткізсе, Атырау және Қарағанды облысының дзюдошылары командалық жарыстың қола жүлдегері атанды.

Сондай-ақ Қазақстан чемпионатында барлығы 12 IJF халықаралық дәрежедегі төреші төрелік етті.

Айта кетейік, Қазақстан чемпионатының нәтижесінде 2025-2026 жылғы спорт маусымына дзюдодан ұлттық құрама жасақталады.

Мәтіннен қате тапсаңыз, бізге жазыңыз