Дзюдодан Париж Олимпиадасының чемпионы Елдос Сметов алғашқы бапкері Ахмет Жұмағұлмен спаррингтік белдесу өткізді. Бұл туралы KAZ.NUR.KZ хабарлайды.
Елдос Сметов бапкерімен белдесуінің видеосын Instagram-дағы ресми парақшасына жариялады. Ол алғашқы жаттықтырушысына түрлі әдіс жасап көргенімен, жеңе алмады.
"Алғашқы бапкеріммен 5 жасымда күресіп, ұта алмай жылап қалушы едім. Әлі күнге ұта алмай келемін", - деп жазды Елдос Сметов.
Еске салайық, Елдос Сметов туған жері Жамбыл облысы Тұрар Рысқұлов ауданының азаматтары сыйлаған көлікті алғашқы бапкері Ахмет Жұмағұлға сыйлаған болатын.
Париж Олимпиадасынан соң демалыс алған Елдос Сметовтің ұлттық құраманың жаттығуларына қашан оралатыны белгілі болған еді. Дзюдошы 9 қаңтарда басталатын оқу-жаттығу жиындарына қатысады деп күтіліп отыр. Сондай-ақ Елдос Сметов келесі жылдың басында ағылшынша үйрену үшін төрт айға Лондонға (Ұлыбритания) оқуға баратынын айтты.
Мақаланың түпнұсқасы: https://kaz.nur.kz/sport/fight/2192474-ali-uta-almai-kelemin-eldos-smetov-algashqy-bapkerimen-kuresti-video/
