Лига кубогы: елордалық қос клуб турнирдің финалына жолдама алды

Кеше, 25 қыркүйекте футболдан Лига кубогының жартылай финалында қазақстандық клубтар қарымта матчтарын өткізді. Бұл туралы KAZ.NUR.KZ хабарлайды.

Лига кубогының бірінші жартылай финалдық жұбында елордалық "Жеңіс" пен алматылық "Қайрат" клубтары кездесті. Бұл ойында "Қайрат" клубының ойыншысы Георгий Зария дубль жасап, алматылық команданы 2:0 есебімен алға шығарды.

Бірақ алғашқы ойында "Жеңіс" клубы 2:0 есебімен басым түскендіктен, жалпы есеп 2:2 болып, командалар өзара мықтыны пенальти сериясында анықтады. Пенальти сериясында "Жеңіс" клубы 3:2 есебімен жеңіске жетті.

Ал екінші жартылай финалдық жұпта елордалық "Астана" мен семейлік "Елімай" клубтары шеберлік байқасты. Екі ойынның қорытындысы бойынша қос клуб 0:0 есебін тіркеп, матч пенальти сериясына ұласты.

Пенальти сериясында "Астана" клубы семейліктерден 3:1 есебімен басым түсіп, Лига кубогының финалдық кезеңіне жолдама алды.

Айта кетейік, "Жеңіс" пен "Астана" арасындағы Лига кубоыгының финалдық матчы 24 қарашада өтеді деп жоспарланған.