Қазақстандағы жаңа футбол турнирі Лига кубогының жеңімпазы пен финалисі қанша сыйақы алатыны анықталды. Бұл туралы KAZ.NUR.KZ Қазақстан футбол лигасының Instagram-дағы ресми парақшасына сілтеме жасап хабарлайды.
Ертең, 23 қарашада Түркістанда жалпы жүлде қоры 1 миллион доллар болатын Лига кубогының жеңімпазы анықталады. Финалда қос елордалық клуб "Жеңіс" пен "Астана" ойнайды. Бұл матчта жеңіске жеткен команда 90 миллион теңге сыйақы алса, финалист 50 миллион теңге еншілейді. Сағат 15:00-де "Түркістан аренада" басталатын ақтық бәсекеге кіру тегін болмақ.
Лига кубогы биыл 25 мамырда Қазақстанның 16 клубының қатысуымен басталған еді. Алғаш болып финалға "Жеңіс" командасы шықты. Олар В тобында қостанайлық "Тобыл" (2:0) және қызылордалық "Қайсарды" (0:1) жеңіп, бірінші орын алды. Ал жартылай финалда Акис Вавалистің шәкірттері қос матчтың қорытындысы бойынша, алматылық "Қайратпен" (2:2) тең ойнап, пенальти сериясында (3:2) басым түсті.
Ал екінші финалист "Астана" ұжымы топтық кезеңде ақтаулық "Каспий" (5:0) мен қарағандылық "Шахтерді" (2:4) жеңіп, D тобында көшбасшы болды. Жартылай финалда семейлік "Елімаймен" жолдары түйісіп, қос матчта да гол соғылмады (0:0). Тек пенальти сериясында ғана (3:1) елордалықтардың мерейі үстем болды.
Мақаланың түпнұсқасы: https://kaz.nur.kz/sport/football/2191071-zhengimpaz-komandaga-90-mln-tengge-qazaqstan-liga-kubogynyng-syiaqysy-belgili-boldy/
