Қазақстан футбол құрамасының бұрынғы ойыншысы Ұлан Қонысбаев "Тараз" футбол клубының спорт директоры болып тағайындалды. Бұл туралы KAZ.NUR.KZ клубтың ресми сайтына сілтеме жасап хабарлайды.
"Қазақстан құрамасының бұрынғы ойыншысы Ұлан Қонысбаев "Тараз" ФК спорт директоры лауазымына бекітілді. Жаңа қызметте Ұлан Әбиірбекұлына сәттілік тілейміз!"- делінген хабарламада.
Ұлан Әбиірбекұлы 1989 жылғы 28 мамырда дүниеге келген. Спорттық мансабын 2006 жылы "Жамбыл" командасында бастаған.
Әр жылдары "Тараз", "Астана", "Шахтер", "Қайрат", "Атырау", "Ақтөбе" секілді клубтарда ойнаған. Ұлттық құрама сапында 32 матч өткізіп, 3 рет мергендік танытқан. Спорттық ғұмырындағы 300-ден аса кездесуде 40-қа жуық голдың авторы болған.
2011 жылдың қорытындысы бойынша Қазақстанның "Үздік ойыншысы" атанған. Ел чемпионы, кубок және Суперкубок иегері.
Естеріңізге сала кетсек, бұған дейін ұлттық құраманың бұрынғы ойыншылары – Нұрбол Жұмасқалиев пен Елдос Ахметов футболдан Қазақстан құрамасы бас бапкерінің көмекшілері болғанын хабарлаған едік.
Мақаланың түпнұсқасы: https://kaz.nur.kz/sport/football/2217866-qazaqstan-futbol-quramasynyng-buryngy-oiynshysy-ulan-qonysbaev-basshylyq-qyzmetke-tagaiyndaldy/
