2028 жылға қарай Премьер-лигадағы легионерлер саны 8 ойыншыға дейін қысқарады

2028 жылға қарай Премьер-лигадағы легионерлер саны 8 ойыншыға дейін қысқарады, деп хабарлайды Қазақстан футбол федерациясына сілтеме жасаған KAZ.NUR.KZ.

ҚФФ-ның бас хатшысы Давид Лория премьер-министр Олжас Бектеновтің төрағалығымен өткен үкімет отырысында елдегі кәсіпқой футболдың дамуы жөнінде баяндама жасаған.

Оның айтуынша, 2026 жылдан бастап Премьер-лигадағы клубтар саны 14-тен 16-ға дейін артады. Ал 2028 жылға қарай легионерлер лимиті біртіндеп 12-ден 8 ойыншыға дейін қысқарады.

Жалпы, биылғы маусымда көрермендер саны бойынша рекорд жаңартылған: Қазақстан Премьер-лигасының ойындарын шамамен 1 миллион жанкүйер тамашалаған. Бұл былтырмен салыстырғанда 30 пайызға көп. Ал барлық кәсіби лиганың жалпы көрермен саны 2 миллионға жуықтап, тарихи көрсеткішке жеткен.

Сондай-ақ Қазақстан УЕФА клубтар рейтингінде 39-орыннан 34-орынға көтеріліп, кейінгі жылдардағы ең жоғары нәтиже тіркелген.

2025 жылы әйелдер арасындағы толыққанды кәсіпқой лига ашылған. Бұл жарыста 14 команда бақ сынаған.

Бұдан бөлек, биыл ұлттық құраманың өз алаңындағы матчтарына 80 мыңнан астам жанкүйер келген. 2026 жылғы әлем чемпионатының іріктеу кезеңі аясындағы Бельгияға қарсы ойын маусымның қорытынды матчы болмақ.

Мәтіннен қате тапсаңыз, бізге жазыңыз