Тарихта болмаған жайт: 54 жастағы грузиялық спортшы өзінің оныншы Олимпиадасына жолдама алды

Грузия құрамасының мүшесі Нино Салуквадзе өзінің оныншы Олимпиадасына жолдама жеңіп алды. Бұл туралы ТАСС агенттігіне сілтеме жасаған KAZ.NUR.KZ хабарлайды.

Әйелдер арасында Олимпиадаға ең көп қатысқан Нино Париждегі төртжылдық додасына да жолдама алды. Бұл мәліметті Грузияның ұлттық олимпиадалық комитеті де растады.

"Үшінші Еуропа ойындарында тапаншамен 25 метрге атудан жүлдегерлер анықталды. Бұл бәсекеде бақ сынаған Нино Салуквазде төртінші орын иеленіп, өз мансабында оныншы Олимпиада ойындарына жолдама алды", - делінген хабарламада.

Олимпиада ойындарының тарихында он Олимпиадаға қатысқан әйел адам әлі тіркелмеген.

Нино Салуквадзе 54 жаста. Ол Грузия спортының тарихындағы ең атақты спортшылардың бірі. Ол 19 жасында алғаш рет Сеул Олимпиадасына қатысып, 25 метрге тапаншамен атудан чемпион атанған. Сондай-ақ ол аталған Олимпиадада 10 метрге тапанша көздеуден күміс медаль иеленді.

Ниноның медаль қоржынында 2008 жылғы Бейжің Олимпиадасының қола жүлдесі де бар. Одан бөлек, Салуквазде бірнеше дүркін әлем және Еуропа чемпионы саналады.

Мәтіннен қате тапсаңыз, бізге жазыңыз