Париж Олимпиадасының чемпионы Елдос Сметов пен тағы басқа да спортшылар мемлекет басшысы Қасым-Жомарт Тоқаевпен бірге Франция президентінің мемлекеттік қабылдауына қатысты. Бұл туралы KAZ.NUR.KZ Ақорданың ресми сайтына сілтеме жасап хабарлайды.
Қасым-Жомарт Тоқаевтың құрметіне орай Франция президенті Эммануэль Макрон Елисей сарайында мемлекеттік қабылдау өткізді. Оған Францияның Үкімет мүшелері, белгілі саясаткерлер, іскерлік топ, ғылым және дипломатия өкілдері, сондай-ақ екі елдің көрнекті мәдениет және спорт қайраткерлері шақырылған.
Ақорданың ресми сайтында жарияланған суреттерден мемлекеттік қабылдауға дзюдодан Париж Олимпиадасының чемпионы Елдос Сметов, Паралимпиаданың екі дүркін жеңімпазы Давид Дегтяров, Париж Паралимпиадасының алтын медаль иегері Ақмарал Науатбек және Лондон Олимпиадасының чемпионы Александр Винокуров та қатысқанын байқауға болады.
Салтанатты кеш соңында Эмманюэль Макрон Қасым-Жомарт Тоқаевқа үстел теннисінен Париж Олимпиадасының қола жүлдегері Алексис Лебренді таныстырды. Кейін Лебрен Қазақстан президентімен үстел теннисін ойнады.
Мақаланың түпнұсқасы: https://kaz.nur.kz/sport/other-sports/2183657-eldos-smetov-toqaevpen-birge-makronnyng-qabyldauynda-boldy-foto/
