Геннадий Головкин тағы бір лауазымды қызметке тағайындалды

Қазақстан ҰОК президенті Геннадий Головкин Азия Олимпиадалық кеңесі (АОК) спорт комитетінің мүшесі атанды. Бұл туралы KAZ.NUR.KZ ҰОК-ның ресми сайтына сілтеме жасап хабарлайды.

Қазақстан Ұлттық Олимпиада комитетінің (ҰОК) басшылары мен қызметкерлері Азия Олимпиадалық кеңесінің (АОК) комитеттері құрамына кірді.

Спорт комитетіне Қазақстан ҰОК президенті Геннадий Головкин тағайындалды. Бас хатшы Әлімжан Ақаев Халықаралық қатынастар комитетінің мүшесі болды. PR және маркетинг департаментінің директоры Гүлназ Шукенова Медиа және БАҚ комитетіне кірді, ал Спорт департаментінің бас менеджері Роман Теміржанов Ақпарат және статистика комитетіне қосылды.

Сондай-ақ Орталық Азияның аймақтық антидопинг ұйымының (RADOCA) директоры Венера Абдулла антидопинг комиссиясының мүшесі атанды. Жаңартылған АОК комитеттері 2028 жылға дейін қызмет атқарады.

Еске салайық, Геннадий Головкин биыл ақпанда Қазақстан ҰОК басшысы болып сайланған еді. Кейін ол мамырда Халықаралық Олимпиада Комитеті Olympism 365 комиссиясының мүшесі, ал қыркүйекте World Boxing Олимпиадалық комиссиясының төрағасы атанды.

Мәтіннен қате тапсаңыз, бізге жазыңыз