Хатинохеде (Жапония) өткен конькимен жүгіруден төрт құрлық чемпионатының марапаттау рәсімінде Қазақстанның ескі әнұранын қосқан Жапония коньки спорты федерациясы өкілдері кешірім сұрап, ресми хат жолдады. Бұл туралы KAZ.NUR.KZ тілшісі хабарлайды.
Жапониядағы турнирде қазақстандық спортшы Виталий Щиголев ерлер арасындағы масс-стартта алтын медаль жеңіп алған еді. Ол жеңіс тұғырына көтерілгенде Қазақстанның ескі әнұраны шырқалған.
Кейін Қазақстан конькишілер одағы өкілдері осы жағдайға байланысты ұйымдастыру комитетіне хат жолдағанын мәлімдеді. Бұл хатқа Жапонияның коньки спорты федерациясы жауап берді.
"Жапония коньки спорты федерациясы Виталий Щиголевті марапаттау рәсімінде Қазақстан әнұраны дұрыс орындалмағаны үшін Қазақстан конькишілер одағы мен Қазақстан құрамасынан шын жүректен кешірім сұрайды. Белгілі болғандай, біз дерекқорымызда сақталған ескі жазбаны қолданыппыз. Мұқият болуымыз керек еді. Болашақта осындай қателіктер қайталанбас үшін біз Халықаралық конькишілер одағына (ISU) арнайы жүйе құруды ұсынғымыз келеді", - делінген хабарламада.
Еске салайық, кәсіпқой боксшы Жәнібек Әлімханұлының жаңазеландиялық Андрей Михайловичпен жекпе-жегі алдында Қазақстанның ескі әнұраны қосылған еді. Кейін Туризм және спорт министрлігі ұйымдастырушыларға ресми наразылық нотасын жолдады.
Мақаланың түпнұсқасы: https://kaz.nur.kz/sport/other-sports/2189621-marapattau-rasiminde-qazaqstannyng-eski-anuranyn-qosqan-zhaponiialyqtar-keshirim-surady/
