Бокстан Қазақстан құрамасының мүшесі Сағындық Тоғамбай жеке бапкері Мырзағали Айтжановтың ерекше қасиетін атап өтті. Бұл туралы KAZ.NUR.KZ "Спорт Министрі" YouTube арнасына сілтеме жасап хабарлайды.
"Мырзағали ағай қандай жарысқа барса да, өзімен бірге қазы-қартасын алып жүреді. Бізбен де бөліседі. Әлемнің спортшыларына, спорт мамандарына құртын беріп жүреді. Бұл дегеніміз өзіміздің қазақылығымыздың белгісі деп ойлаймын. Барлық мықты жарысқа қазы-қарта мен құртын алып жүреді. Мырзағали ағай өзімен бірге екі сөмке алады. Соның біреуін бізді тамақтандыру үшін алып келеді", - деді Сағындық Тоғамбай.
Сондай-ақ ұлттық құрамның бұрынғы бас бапкері болған Мырзағали Айтжанов Париж Олимпиадасына қазы-қарта, жілік-жілік ет апаратынын айтқан еді.
Айта кетейік, Таиландтың Чиангмай қаласында өткен Азия чемпионатында Сағындық Тоғамбай 92 кг дейінгі салмақ дәрежесінде алтын медаль еншіледі.
Сондай-ақ ол 2022 жылы Амманда өткен Азия біріншілігінде қола медаль жеңіп алды. Дәл сол жылы Ханчжоуда өткен Азия ойындарында да қола медальді қанжығасына байлады.
Мақаланың түпнұсқасы: https://kaz.nur.kz/sport/other-sports/2210234-qazy-qarta-men-qurtyn-alyp-zhuredi-bokstan-aziia-chempiony-bapkeri-myrzagali-aitzhanovtyng-erekshe-qasietin-atady/
